* * *
Югыт керкуат öтпырись мыдзöм
старушка пырас
И гусьöник порог дорат пуксяс.
Лэчыт синнат казялан: паськöм сылöн
важ и бырöм.
Повзян: эз бы нöбöт мыйкö гусьöн.
Сiя корас ваок – только тэ он вежöрт
сылiсь кывсö.
Поди, тöдлiн? – вунöтсис ни важын.
Мыйкö пондас баитны – вежöрттöг
быдöс сылiсь кывзан.
Пернапас пуктас, бöр мунас гажтöм.
Эн думайт, кин пыралiс – чожжык,
чожжык бурöт ассит нывтö.
Кылан, горзö кыдз зыбкаас öтнас?
Сiя тöдö быдöс, сiя эз на вунöт сiйö
кывсö.
Только кужан я нывтö вежöртны?
* * *
Шытöм морт ветлöтö му вылöт,
Шытöг олö, шытöг горзö.
А шынньöвтан сылö мунтöннят, –
Сьöлöм ванйöв паныт оссьö.
Шытöм отир олö му вылын,
Шытöг быдыслö веритö.
Шытöг ен видзöтö вылiсянь,
Дöс вежöртö и терпитö.
* * *
Кинкö лöсйöм этö туйсö ныж черöн,
И тэрмасьöм сiйö му вылас лэдзны.
Натьтö, сы вылын чужьяся ме не первöй,
И не первöй, натьтö, сы вылын ме пезьда.
Быд тшупöтыс эстöн зубытсянь горзö.
Быд чукыльыс эстöн юр пиньöвтны кöсйö.
Тi виль туй вылö, мунiссез, öддьöн корсят?
Но ныж черыс – кылат? – вильö туй ни лöсйö.
Нiя локтасö...
Видзчисям гöссезöс ми кортöмöсь.
О. Мандельштам
Нiя локтасö, томöсь и басöкöсь,
Нiя локтасö, смелöсь и вынаöсь,
И строитасö керкусö югытö,
И строитасö керкусö вылынö.
Нiя лоасö шудаöсь, мичаöсь,
Сöдз сьöлöмаöсь, югыт синаöсь,
И миянлiсь проститны кужасö
Вынтöм ловвез, кöстiсьöм спинаэз.
Нiя локтасö, томöсь и басöкöсь,
И строитасö керкусö югытö.
Миян челядьным!
* * *
Ме юрбитны эшö эг мыдз
Тэ пондаись, ёрт.
Но сьöлöмам мыйкö чегис –
Оз лэб сэсся борд.
Öнi ог горзы и ог бöрд,
Борддэз ог паськöт.
И сьöлöмö – рытся шондi,
Жагвыв кусö öд.
Онтöм ойез сэсся абу,
Абу гажтöм лун.
Лöз саридзö кывтö кадыс –
Токо синнэз кунь.
Ме юрбитны эшö эг мыдз
Тэ пондаись, ёрт.
Но сьöлöмам мыйкö чегис –
Оз лэб сэсся борд.
* * *
Ме локта зэрöн тэ дынö,
Рамыник лöнь зэрокöн.
И чышка мыдзсö сьöлöмсит,
Гывйышта бусöсь коккез.
Котöрта чож туёк вылöт
И сыла вöрас.
Тэ чернат вöрас, ой, эн лок –
Ме пуö пöрма.
* * *
Муыс быд годöн крепытжыка видзö.
Годдэз — кыдз пуын кытшшез.
Быд годöн донажык и вöрыс, и видзыс.
И ог некытчö ни бы пышшы.
И пу моз сулала бы – вына и крепыт,
Горт му пытшкын вуджжезöн видзся.
И радöн примита и тöввез, и зэррез,
Поклон пукта вöрлö и видзлö.