Тэ олан бы дыр
Тэ кывзан кöкöс – лöнь, кыдз мыр –
И лыддян, мымда кольччö овны,
А лыдыс кузь, и немись повны:
Эшö жыкруйтан дырся-дыр.
Тэ дыр бы олан, он бы кув,
Но кадлöн тöлыс кортö-кисьтö,
И вичку заптö ни масiссез,
А плотник – пöввез да кöртув.
Радейтан биок
Мыйсянь жö вына, мылаа да пöт
И мунас мича
горт миян – держава?
А сысянь, что дышöтчытöг уджалам
И тэ, и ме
и донтамö, кыдз мамöс,
и ыбсянь, и заводсянь – пыр отсöт.
Радейтны, донтны – юны чöскыт шог –
Некин оз вермы тшöктыны:
Эд эстöн –
Сьöлöмат мамыт кольöм зарни места,
Кытöн поздiсьö радейтан биок.
Ме не философ – деревенскöй дед,
И юр шöрокö волькыт ни, дзик дыня,
Быдöс меряйта аслам дзор аршинöн
и шуа:
кин горт мусö оз радейт,
Оланыс сылöн –
пöлабока, джыння.
Тулысся Микола
Микола чикнялö:
туруныс –
Куканьлö пидзöсви ни топ,
А чöжнас, дзодзогнас, туринас
Ошшасьö быд нюр и быд нёп!
А льöмпуыс!..
Эмöсь я кыввез,
Мед ошкыны льöмпулiсь выв?
Видзöтан – и вывтырыт сылö:
Не пу, а дзоридззеза ныв!
Природа тэрмасьö да пизьö:
Эд тулыслö дона быд час!
Мый сылö, что каррезын кризис,
Что бырсис Европаын газ,
Что округлöн ним мöдкодьсялiс,
Что эз ло серпаса Оньков?!
Микола горалö, югьялö,
Вынсьöтö быд ловьялiсь лов.
Поэзия йылiсь кыв
Поэзия...
Кылыс – дзик бур сьыланкыв.
Поэзия – мый сiя лоö?
Сьöлöмлöн да öтöрлöн öтласа кыв?
А может, – тöждöм чизыр сола?
Да, сэтшöмкодь правдаыс этаын эм,
И темаыс сiя не учöт.
Поэзия – этö олан радейтöм,
Мый шондiсянь тэ пытшкö рудзö.
Поэзия – майлöн дзоридза орсан,
И зарниа аррезлöн гажыс,
А разумлöн
ныжмытöм пурта нярьян,
Мый корзьöм строкаэсö няжйö.
Поэзия – может, и мыйкö мöдiк –
Дзирытжык да шондi кодь гажа,
Кинлöкö – дзик лайкыт дюттяннэзлöн чывк,
Кинлöкö – и нянься донажык.
Мам
Вöтаси мамöс: сувтiс одзам
Том мортöн, дзик рисуйтöм ен:
Чужöмыс зарни биöн сотчö...
– Ме локтi. Тэ видзчисин? Эн?.. –
А вовлiс сiя не мыччасьны –
Видзöтны, тöдны, кыдз да мый:
Уджала я? Ог я шогасьлы?
Эз я нуждалöн везыс кый?
Не пыр ме мамöс берегитi...
И сiя асьсö – тожö эз:
Эд мийö, дзез кынöммез, витöн
Каттисим бердас, топ сирвез!
Войнаыс мамöс пурис-песiс,
Быд лёкнас вöвлi горшви пöт,
Маитчис няньтöг, совтöг, пестöг –
Эд трудоденьыс эз жольöт…
Вöтаси.
Думанам мичами,
Дзик öзйис син одзам масiсь.
Кытчöдз тэ олан, олö мамыт,
А сiя – ловнымöс шонтiсь.
Быдсöн я коми?
«...Скиффез сайын, ойланяс, олiсö
гелоннез, будиннез, йирккез...»
Геродот
Ме шуся коми. А дед-бабö – киннез?
Висьтасьö тай кузь кыла Геродот,
Что Кама пöлöн олöмась будиннез,
Дак, может, ме – не чиг жö коми морт?
Эж ежели дед-бабö ны коласiсь,
Сэк вирам олö и будинскöй воть.
Не весь жö, натьтö, менö рыт и асыв
Саридзö ыскöвтöтлö вöрдлöн додь!
Кыдз вöлi, сiйö Шондi-айным тöдö
Да скифскöй лыа муыс – Камадор,
Но Му да Шондi – гозъя,
и некöда
Оз осьтö тайнасö, кöть Еныс кор!
Тулыслö букет
Тулыс голльö!
Кылат? Одö?
Ме старик, да кыла:
Лов ордалö, яндзим содö,
Но оз тырмы мыла
Шондi югöрсö видзчисьны,
И югдандор чечча
Да лöз асывлiсь дзоридззез
Тулыс одзö тэча.