Я.М. Рочевлöн гижöдъяс йылысь мöвпъяс-пасйöдъяс

Тавося тöвшöрын коми йöз пасйисны 100 во Я.М. Рочев чужан лунсянь. Яков Митрофанович Рочев – тöдчана коми гижысь, чужлiс 1909-öд вося январ 23 лунö Уквавом сиктын. 1930-öд воын Мокчойса кык ступеня школа помалöм бöрын пырис уджавны велöдысьöн Абезь сиктса школаö. Челядьöс грамотаö велöдiгöн, том учительлы окота лои видлыны ассьыс вынсö и литератураын. Регыд «Ордым» журналын петiсны Яков Митрофановичлöн медводдза гижöдъяс. Тайö вöлiны очеркъяс да кывбуръяс. А 1942 воын Я.М. Рочевöс пыртiсны сöветскöй гижысьяс котырö. Тайö кад кежлö сiйö помалiс нин Коми пединститут да уджалiс Коми небöг лэдзанiнын редакторöн. 1953–1970 воясын веськöдлiс «Войвыв кодзув» журналöн.
Я.М. Рочевлысь гижöдъяссö вöлi пасйöма И.Куратов нима государственнöй премияöн.
Яков Митрофанович кувсьылiс 1977 вося сентябр 3 лунö.
Лыддьысьысьлы Я.М. Рочевлöн творчествоыс медбура тöдса сылöн «Кык друг» роман сертиыс. Гижöдыс медводдзаысь петiс 1950-öд воö да пырысьтöм-пыр «веськалiс» школаса лыддьысян небöгъясö. «Кык друг» роман и талун велöдöны школаясын: челядьлы кажитчöны гижöдыслöн лöсьыд сюжетыс, ыджыд сьöлöма геройясыс, бур вöсна налöн тышкасьöмыс. Сэсся и челядь да том йöз йылысь гырысь гижöдъясыд коми литератураын абу уна. Я.Рочевлöн «Кык другыскöд» орччöн позьö сувтöдны сöмын И.Г. Тороповлысь Фёдор Мелехин йылысь повесьтъяссö.
Я.М. Рочев олiс да гижис сэтшöм кадö, кор миян странаын литература вöлi сöветскöй пропагандалöн юкöнöн. Та йылысь öнi уна гижöны, мукöддырйи сiйö кадся гижысьясöс да налысь творчествосö дивитöм сорöн: абу пö пешшитчöмаöсь литература сöстöмлун вöсна, гижöмаöсь, кыдзи тшöктöны «партия да правительство». Мый та вылö шуан? И сэтшöмторйыс, кöнкö, вöлi. Но талун тыдовтчö, мый партияыс да правительствоыс абу жö лёкторйö чуксалöмаöсь. Синмад шыбитчö и мöдтор: коми литературалöн выныс ёна содiс буретш 1950-öд воясö. Та йылысь висьталö литератураын ыджыд эпическöй жанрлöн нырвизялöмыс. 1955 воын В.В. Юхнин йöзöдiс выльмöдöм «Алöй лента», 1957-ын – «Тундраса бияс». Г.А. Фёдоровлöн «Кыа петiгöн» роман петiс 1955 воын, Я.М. Рочевлöн трилогияыс – 1950-öд восянь 1969-öдöдз («Кык друг», Изьва гызьö», «Му вежöм»).
Я.М. Рочев гижöдъясын унатор подулалöма сöвет литературалöн öтка методöн – соцреализмöн. Кöть нин босьтам гижöдъясыслысь медшöр визувсö, кöнi тыдовтчö сöвет кадлöн медшöр идеяыс: геройяс тышкасьöны талунъяыскöд бурджык аскиалун вöсна. Та боксянь «Кык друг», Изьва гызьö», «Му вежöм» – соцреалистическöй да, позьö весиг шуны, всесоюзнöй романъяс. Сэк жö, Я.М. Рочевлöн трилогияыс восьтö коми мортлысь енэжтассö да лоö миян литературалöн тöдчана вермöмöн. Трилогияыс висьталö и гижысьыслöн ас морттуй да гижан сер йылысь: кытчöдз судзö сылöн видзöдласыс, ёна-ö мöрччö серпаса кывйыс.
Мöвпалыштам сы йылысь, кутшöмöн воссьöны Я.М. Рочевлöн романъясыс талунъя лыддьысьысьлы.
Трилогияöн тöдмасигöн, медводз казялан, мый геройяслысь олан кадсö гижысьыс вывтi суктöма лёк лоöмторъясöн. Сiдз, «Кык другын» сёрниыс мунö кызьöд нэм пуксяндыр йылысь, да гижöдыслысь сёртассö тэчöма войвывса комияс да ненецъяс олöмысь жугыль серпасъясысь. Йöзыс тшыгъялöны, уджтöмалöны, кынöмпöт ради медасьлöны быд сикас уджö, шöйтöны-ветлöны ылi муясöд – думсьыныс кöсйöны нажöвитыштыны сьöмтор, но лэдзöны ичöтик удждонсö вина вылö, юöны-кодалöны гортъясаныс, тышкасьöны öта-мöдкöд, оз аддзыны, да оз и корсьны шуштöм олöмыслысь помкасö. Татшöм «сынöдö» овмöдöма авторыс ассьыс геройясöс – коми крестьянинлысь писö Геня Дуркинöс да кöр видзысь яранлысь писö Вася Манзадейöс. Кык друг дорö олöмыс абу мелi. Геня водз кольö сирöтаöн да ачыс перйö кынöмпöт: корö милöстина, гожöмын отсасьö йöзлы турун пуктыны, тöвнас уджалö няр керкаын. Сэтшöм сяма и Васялöн олöмыс. Озыр челядьлöн тешитчöм вöсна сiйö шыбитö школа, сэсся сьöкыда висьмö батьыс да зонкалы лоö, верстьö туйö, видзны купечлысь кöр стада, тундраын веськалö неминучаö: раминик Васяöс помкатöг мыждöны морт виöмысь да арестуйтöны. Геня да Вася оз на вермыны сулавны паныд татшöм нелючкияслы да кылöны асьнысö вывтi шуштöма. Та вöсна и найö нимсянь висьталöм да серпасалöм лоöмторъясыс гажтöмöсь, пемыдöсь, бур вылö лачатöмöсь. Романын серпасалöм олöмыс быттьö югыдыслöн пом кежлö лöсьöдчö, абу öд сiдз-тадз трилогиялысь бöръя юкöнсö гижысьыс шуöма «Му вежандырöн». Сьöкыдлунъясыс геройяс олöмын пыр содöны, джудждаммöны, дугдöны тöрны öти мортлöн туйвизьö. Сукмöм шогыс лоö öтувъяöн, ставлы инманаöн – заводитчö Медводдза мирöвöй война. Тайö лоöмторйыс и помалö «Кык друг» романлысь медводдза юкöнсö. Мöд юкöнын лоöмторъяслöн рöмъясыс вежсьöны. Кык друг веськалöны бур йöз шöрö, кодъясöн петкöдчöны самодержавиелы паныд сулалысьяс. На пöвстын эмöсь Россия шöринысь ыстöмаяс – Григорий Матвеевич Невольский да Михадзе, и татчöс интеллигенция – Михаил Петрович Артеев да Яков Васильевич Чутов. Найö и велöдöны Геняöс да Васяöс не сетчыны лёкыслы, не уськöдны морт ним. Зонкаяс тöлксялöны-верстяммöны «политикъяслöн» (тадзи Макла сиктса олысьяс нимтöны Невольскийöс да сылысь ёртъяссö) борд улын, налöн югдаммö олöм кылöмыс, кöть и сьöкыд уджыс геройяс олöмысь оз чин. Талун гöгöрвоана, мый тайö визь нуöдтöгыс романыс эськö «эз артмы», кыдзи вöлi «абу артмöма» В.Юхнинлöн «Алöй лентаыслöн» медводдза вариантыс. Сiйöс бöрыньтлiсны йöзöдöмысь сы вöсна, мый гижысьыс этша да абу «кыдзи колö» петкöдлöма большевикъясöс, йöз костын налысь уджсö.
«Кык друг» роман уна героя. Öтияс, шöр геройяс ногöн, воссьöны вочасöн, роман чöж – тайö зонкаяслöн ёртъяс Прошка, Зоя да Дуня, сиктса пролетарийяс Гора Иван да Калина, том зонъяс Ёгор да Федя, Макла сиктö вайöдöм «политикъяс» Невольский да Артеев, купеч Кузьма Мироныч Терешкин. Мöдъяс: Иван Дуркин – Генялöн батьыс, батьыслöн ёрт – Кöсöй Панько, Ванюк купеч, дяк пи Симон, старшöй пастук Селифан да сылöн Зимöгор племянникыс, венеч улысь пышйöм Ануш, Кардорын большевикъясöн веськöдлысь Руфим Юрьевич Кичигин да мукöд – петкöдчылöны романлöн торъя юкöнъясын. Коймöдъясöс аддзывлан сöмын öти эпизодысь. Геройяслöн уна лыдыс сьöктöдö романлысь композициясö, сiдзкö и – лыддьысьысьлысь уджсö, öд вежöрын ковмö кутны сё кымын герой костын йитöдъяс. Мый могысь гижысьыс вöчöма романсö уна йöзаöн? Весиг кыкпöвсталöма, дублируйтöма öткодь характеръяс, öткодь оланногъяс? Артеев да Невольский, Федя да Ёгор, Зоя да Дуня, Ванюк купеч да Мирон Кузьма, Мефодь Мишка да Ванюк Самко. Тöдчана, мый и шöр геройясыс Вася да Геня – аслыспöлöс двойникъяс: найö лöсялöны сямнас, восьлалöны öткодь туйöд. Геройясöс кыкпöвсталöмыс сетö позянлун авторлы торъя олöмъясысь, морт этшъясысь тöдчöдны öткодьлунсö, уна йöзöс öтувтанторсö, типичнöйсö. Гижысьлöн тайö кöсйöмыс оз торк унджык образыслысь аслыспöлöслунсö, но овлö и дзескöдö геройясöс, «кöрталö» ки-кокнысö öти могöн – петкöдлыны, мый мортлöн характерыс петö сылöн социальнöй инысь. Сiдз, купеч Кузьма Миронович Терешкинкöд да Ванюк купечкöд ми паныдасьлам сэк, кор эрдöдчö налöн горшлуныс, наянлуныс, но этшатор тöдмалам семьяпытшса олöм йывсьыныс. Вывтi веськöдöма-шыльöдöма Григорий Матвеевич Невольскийлöн да Михаил Петрович Артеевлöн образъяс: налöн характеръясын ёнмöдöма öти визь – самодержавиелы паныд сулалöм. Кыкнанныс лоöны гöгöрвоанаöсь накöд йитчöм медводдза лоöмторъяссянь да оз нин вичмöдны лыддьысьысьлы некутшöм виччысьтöмтор. Роман чöжыс выльмöны накöд лоöмторъяс, но оз асьныс геройяс.
Сэк жö, художествоа шедöдöмторйöн лоö сiйö, кыдзи гижысь петкöдлö «политикъяс» дорö йöзлысь вежсьöмсö. Медводз Невольскийкöд «тöдмöдö» сиктса детинка, инö öшйывлытöм Прошка: «Синъясыс гырысьöсь, гöгрöсöсь, юрсиыс поплöн кодь, а тошкыс веськыда гöгйöдзыс! Сэтшöм страшнöй!»1 . Здук мысти тыдовтчö, мый Прошка сöрö, а вайöдöм мортыс ортсысянь этша торъялö сiйöс кытшалысь йöзысь. Но век жö Прошкалöн «серпасыс» стöча восьтö, кутшöма полiсны «политикысь» и верстьö мужикъяс, кодъяс видзöдiсны «тöдтöм морт вылö, быттьö сiйö вöлi ош». Кутшöмöсь вöлiны сиктсаяслöн Невольскийкöд медводдза волысьöмъясыс, гижысь оз серпасав, сiйö сöмын юöртö, мый «сэтшöмъяс, кыдзи Ёгор да Гора Иван, не сöмын дугдiсны повны Невольскийысь, но, шуöны, рытъясын частö пукавлывлöны сы ордын». Авторыс быттьö дженьдöдö Невольскийкöд тöдмасян кадсö. Чайтан, сиктса йöз да Григорий Матвеевич регыд кадöн велалiсны öта-мöд дорö. Геройкöд та бöрся паныдасьöмыс нöшта на эскöдö, мый сiйö – сибыд морт. Невольский гозъялöн оланiныс кутö мунны мастерскöй либö клуб вылö: том йöз волывлöны сэтчö варовитыштны, нывъяс – велöдчыны Невольский гöтырлысь вурсьыны да прöшви кыны, олöмаяс – «лöсьöдны коса исип, рöвняйтны пила пиньяс либö спояйтны розялöм дозмук». «Политикысь» ошкысь моз полысьяс некымын тöлысь мысти чайтöны нин сiйöс ас мортöн. Век жö гижысьыслы колiс аддзыны кутшöмкö лоöмтор да помка, мед сылöн геройясыс гöгöрвоисны, мый Григорий Матвеевич – абу сöмын варов да киподтуя, но и увтыртöмаясöс дорйысь морт. Маклаын олысьяс водзын политик петкöдчö выль ногöн, кор виччысьтöг кувсьö Генялöн батьыс, доймö Мирон Кузьма вöсна вöвъясöн ордйысигöн да. Дорйыны Иван Дуркинлысь семьясö сяммö сöмын Невольский.
Колö шуны, мый ордйысьöмсö да Генялысь семьясö шог суöмсö серпасалöма ыджыд художествоа вынöн: син водзын ловзьöны тöвзьысь вöвъяс, ордйысьысьяслöн доналöм чужöмъяс, и со – чагторъясöдз пасьмунö додь, еджыд лымсö юковтö Иван вомысь визувтысь вир. Туй шöрын горзö-лювзö Мирон Кузьма, жалитö жугалöм додьсö. Геня танi абу, но лоöмторъяссö петкöдлöма повзьöмысла измöм морт синъясöн. Шöйöвошöм йöз быттьö вунöдöны, мый колö вöчны, и медводдзаысь тайö сьöкыд здукö Невольский босьтчö веськöдлыны наöн: «Сулаланныд вичкоын моз… Любуйтчынысö танi нинöмöн. Шойсö колö нуны…» – дивитöмпырысь индö сiйö «öтчукöрын нинöм вöчтöг сулалысь мужикъяслы». Водзö ыджыдалö Генялöн видзöдласыс. Гижысь оз шуав, оз висьтав Генялысь шуштöм кылöмъяссö. Сöмын öтчыдысь сiйö пасйö зонкалысь сьöлöм дойдана мöвпсö: «Быри батьыс. Кыдзи öнi найö сытöг кутасны овны?». Та пыдди гижысь сетö Геня синмöн аддзана серпасъяс: «Джодж шöрын пласьт куйлö батьыс. Чужöмыс лöзöдöма. Вом доръясö ёдöма вир… Бабыс кымыньöн куйлö сы дiнын да, юрсö тракйигтыр, лёкгоршöн горзö-бöрдö, а мамыс садьтöг куйлö лабич вылын… Кутшöмкö мужичöйяс вöрöдöны сiйöс киöдыс, а Ёгор сулалö юр дiнас ва тыра кöшöн да, тыдалö, зiльö юктöдны». Генялöн видзöдласыс сувтлытöг вешйö öтиласянь мöдлаö, быттьö зонкаыс оз гöгöрво, мый аддзö, оз куж донъявнысö, мый лоöма. Та вылö индöны сёрникузяяслöн ногыс, оръясяна интонацияыс, сувтлöмъясыс, ас сиктын олысь да тöдса мужичöйясöс «кутшöмкööн» шуöмыс. Но стöч татшöм дженьыд серпасторъяснас авторыс и писькöдчö Генялöн виралысь сьöлöм да став лов-вежöрсö босьтöм дой дорас.
Кокньöдны Дуркинъяслысь шогсö некод оз куж. Мужикъяс, Иванлöн другъясыс, челядь моз виччысьöны, мый «гашкö, садьмас купечлöн сöвестьыс, гашкö, сiйö убöлитас отсыштны вердысьöс воштöм семьялы». Но «Иван Дуркинкöд лоöмтор йывсьыс Кузьма Мироныч сiйö жö луннас и вунöдiс. «Ыджыд тай делö додь жугалöмыд»,– ас кежас тöлкуйтiс сiйö». Йöзыс эськö и дивитöны Мирон Кузьмаöс веськодьлунсьыс, но сöмын ас кежаныс. Ёгор вöзйö ветлыны купеч ордö отсöгла, но сэтысь Иванлöн мамыс «сьöрсьыс вайис ещö на курыдджык синва». Коньöрö уськöдчöм йöзкöд авторыс орччöдö Невольскийлысь активнöй позициясö. Сiйö велöдö сетны купечöс судö да отсалö дöвалы перйыны сылысь сьöм. Тайö лоöмторйыс и восьтö йöзлы Невольский характерысь таöдз тыдавтöмторсö: власьт кутысьяс водзын повтöмлунсö, кедзовтöм йöз вöсна сулавны кужöмсö. Татшöмöн йöз вежöрын Невольский кольö роман помöдзыс, сы вöсна мый водзö локтысь серпасъясыс вынсьöдöны Невольскийлысь сöмын тайö качествосö.
Сиктса йöзлöн образъяс пöвстын эмöсь тырвыйö бура восьтöмъяс и сэтшöмъяс, кодъяс оз пуксьыны вежöрад. Гижысьлöн вермöмöн лоö Калиналöн образыс. Медводдза видзöдлас вылö, Калина – морт, кодi нинöм оз артав аслас олöмын водзвыв да сетчöма олöм визулыслы: кытчö гыыс нуас, сэтчö и кывтас. Сiйö пöшти оз ов гортас, дугдывтöг вежлалö уджъяс, оз бöрыньт вина румка, «кыдзкö сiдзи нин сылöн вöлi артмö – быд туй водзвылын да туйысь воöм бöрын юны». Унатор висьталö кöзяин йывсьыс Калиналöн оланiныс: «Рыныш кодь юр пöла важ керкаыс сылöн сулалiс качайсянь нёль керка сайын. Олiс гöлиника. Сарай вевтыс перевединанас усьöма, сьöдасьöм важ тьöс помъясыс петук бöж моз чурвидзöны». Тайö серпасын Калина кажитчö лэччысьöм мортöн, кодлы ставыс веськодь. Такöд öттшöтш Калинакöд йитчöм лоöмторъясын быд пöрйö эм геройсö выль ногöн гöгöрвоöдысь деталь. Со код юра Калина «...туй вомöн кыссьö гортлань. Пач чышкан лыс кодь кузь сьöд юрсиыс öшйöма син вылö. Тöлöн быгалöм дöрöмыс мышкöдыс косяссьöма, вожа. Кизьясыс оръясьöмаöсь. Рот-йысьöм важ пинжаксö пöлаöдыс босьтöмöн сiйö шатлалiгтыр собис няйтöд да нориника сьылiс...». Качай дорö локтöм том йöз чукöртчöмаöсь Калина гöгöр да ызгöны-сералöны сы вылын. Некод оз дорйы дяк Симонысь, кодi усьöдö Калина вылö пурсьысь понйöс. Некод оз отсышт, кор «пон звер моз уськöдчис Калина вылö, ... кок йылысь пöрöдiс няйтö». Но ачыс авторыс Калиналысь юöмсö серпасалö оз серамтуйö пуктöм могысь. Мöвпыштны кö, Калина весиг код юрöн тыдовтчö ыджыдджык сьöлöмаöн сiйöс сералысьясысь.
Калиналöн оласногын тырмытöмторъясыс шыбитчöны синмö. Бурлуныс: йöз дорö сибыдлуныс, восьса сьöлöмыс, ас вылын нюмъявны кужöмыс, оптимизмыс гöгöрвосьöны вочасöн, ньöжйöник, лоöмторйысь лоöмторйö, юöрысь юöрö. Бать-мамсö воштöм Генялы быть лоö мöвпавны нажöтка йылысь, быдлунся удж йылысь. «Вот Калина удитöма вöрö мунны. Сiйö эськö аскöдыс нуöдiс», – шогсьö зонка. Калина йылысь мöвпыштöма дженьыда, быттьöкö пырмунiгмоз, но висьталöма унатор: Калина эськö мукöдъяс моз эз артась Генялöн ичöт арлыдöн, пыдди пуктiс сылысь уджачлунсö, кынöмпöт перйыны зiльöмсö, эз повзьы босьтны уджавны аскöдыс. Калина видзö лёкторйысь Гора Иванöс да Ёгорöс, кор найö код юрöн жулльöны Мирон Кузьмалысь öшиньяссö да тышкасьöны купеч слугаяскöд. Медым мездыны ёртъяссö нöйтöмысь, серамсорöн вöйпöдö найöс «пöкöритчыны» урадниклы. «Мунамöй, зонъяс, шойччыштам!» – нуöдö чижовкаö Ёгорöс да Гора Иванöс, а мöд асывнас ачыс жö и пукталö купечлы öшинь стеклöяссö. «Сiдз и шуа Кузьмалы,– ас кежас думайтiс мудер Калина.– Владыка да покровитель миян, Кузьма Мироныч. Мыжаöсь ми тi водзын, но тi нин кыдзкö-мыйкö прöститöй миянöс, грешникъясöс... Ас йöз, кыз му вылас кыдзкö лöсьöдчам жö на!.. А сэсся тыдавны кутас». Калина нюмъялö ас коддьöм вылас, но сералö и купечöс, аддзö Кузьма этшысь шöрвизьсö: топыдлунсö, мужикъяс водзын ен туйö пуксьöмсö. И оз ылав: Кузьма Миронович Терешкин оз и гöгöрво прамöя, мыйöн торъялöны пыдди пуктöм да леститчöм – вывтi нин окота лоны «владыкаöн да покровительöн».
Казялан, мый Калинаöс йöзыс оз тэрмасьны ошкыны, но гажтöм здукъясö асьныс виччысьöны сысянь ышöдöм, гажöдöм. И збыльысь, Калиналöн шмонитны кужöмыс разöдö шуштöмсö кузь туй дженьдöдiгöн, война вылö колльöдчигöн, сьöкыд удж бертiгöн. Быдöнлы Калина аддзö виччысяна, шань кыв. Буретш Калина чуксалö шонтысьны бипур дорö ас коддьöм туй выв йöзöс. Сiйö öтнас сувтö Геня дор, кор вöр пилитан заводса дöвереннöй орччöдö зонкаöс пузчужöм кагакöд да оз кöсйы босьтны удж вылö. «Прöста сiдз чайтанныд, господин начальник. Ми такöд куим во öтлаын кер лэдзим. Уджнас сiйö некутшöм мужиклы оз сетчы»,– пöръясьыштiс Калина. Дöвереннöй, дерт, татшöмторлы эз эскы, но век жö босьтiс Геняöс рейка бöрйыны. Гортлань туй чинтiгöн, Геня, Калина да Федя узьмöдчöны пöрысь гозъя ордын. «Пöрысь бать-мамыслы тшöтш карточка рöдимöй дитяöй ыстöма»,– ошйысьö туй выв йöзлы пöч. Калина бура гöгöрвоö нывбабаöс, мамлысь шогсьöм-гажтöмтчöмсö, пинас нимкодясьöмсö, да бур сьöлöмöн шыöдчö: «А пельк, тыдалö, зонмыс». Позьö стöча шуны, мый романын абу ни öти лоöмтор, кор эськö Калиналы эз сюрны мортöс доръян да бурöдан кывъяс. Тайö кужöмыс сайöдö Калина олöмысь тырмытöмторъяссö, но дзикöдзыс оз жö дзеб, мый вöчö геройлысь образсö ловъяöн, збыль олöмлы лöсялысьöн.
Дзик мöд ногöн гижысь восьтö озыр йöзлысь характеръяс. Найö öти ног мöвпалöны, öткодя кутöны йöз водзын асьнысö. Татшöмторйыс артмö сы вöсна, мый гижысьыс оз и пукты ас водзас мог – петкöдлыны налысь олöмсö гöгöрбок, сiдзкö и «ловзьöдны», мортъяммöдны найöс. Гижысьлы кивывджык эрдöдны налысь горшлунсö, йöзöс увтыртан сямсö да чужтыны на дорö зывöктöм. Ванюк купечкöд лыддьысьысь паныдасьлö сöмын öтчыдысь, но тайö öти паныдасьлöмыс тырбура гöгöрвоöдö тайö геройыслысь лёклунсö, уджалысьясöс немöстöмсö. Лоöмторсö котыртöма Генялöн видзöдласöн. Öграда пöвъяс костöд Геня аддзö, кыдзи «Ванюк старик, малича юрсö лэдзöма, беддя сулалö кильчö пос вылын. Бокланьын, кильчöö пыксьöмöн, шапкатöм, син вылö öшöдчыштöм кузь еджыд юрсиа, сулалö коддзыштöм Федя, а на водзладорын копыртчöма сылöн пöрысь мамыс да кевмысьö Ванюк стариклы». Ыджыд тöдчанлун тайö серпасын босьтö сiйö, кöнi да кыдзи геройясыс сулалöны. Ванюк купеч видзöдö эня-пиа вылö вылiсянь, та вöсна «юрсö лэдзöма». Федя да сылöн мамыс сiдз нин сулалöны улынджык, но пöрысь нывбаба нöшта на «копыртчöма». Геняöн кылöм сёрниыс содтöд джудждöдö геройяс костын ылдöссö, коластсö. Федя кöсйö гöтрасьны, и мамыс кевмысьö Ванюк купечлы, мед эськö жöниклы позис кольччывлыны кöр стадаысь. Стада кöзяинлöн вочавидзöмыс виччысьтöм, мисьтöм, морт ним уськöдана: «Гö-ö-öтрасяс... Номыръяс чужтыны али мый? Ассьыс кынöмсö оз вермы вердны, а гöтрасяс... Гöтрасьысьыслöн вося удждонсö водзö сёйöма». Татшöм шуасьöмыс купечлы кажитчö небыдöн на, да кост мысти сiйö содтö: «Гöтырпуыс, менам Серколöн кычиыс, быдмытöм на...». Здук кежлö Генялöн видзöдласыс вежсьывлö Федя мöвпöн: «Таысь омöльджык кывъясыс эз вермыны лоны». Тайö сёрникузяыс, дерт, медъёна лöсялö Федялöн кылöмъяслы да пасйö терпенньöыслысь суйöрсö. Кывзысьысь да рам Федя друг «веськöдчис, вештiс чужöм вылö öшйöм кузь еджыд юрсисö, ньöти тэрмасьтöг гоз-мöдысь воськовтiс стариклань да нöш кодь кулакнас камгис стариклы пель бокас: – На тэныд, вир юысь!» Ставыс, киноын моз, вöчсьö син водзын, öнi. Некутшöм содтöд донъялöм оз и ков, ачыс лоöмторйыс лоö медбур, медвына донъялöмöн.
Нажöвитöмторйыс пыр кажитчö этшаöн Мирон Кузьмалы. «Уна дорад пыр унджык колö»,– тадзи восьтö сылысь олан русö Генялöн мамыс. Топыдлун, горшлун медводз шыбитчöны синмö Терешкинлöн овмöсын. Мыйыс сöмын абу купечлöн лавкаын, «пöлкаяс дзик тырöмаöсь быдсяма тöварнас ... стенö öшлöмаöсь уна рöма мича лентаяс, гырысь байкöвöй öдьöялöяс, шöвк чышъянъяс... Гöрд нойöн мичмöдöм лым еджыд пимияскöд орччöн öшалöны смоль сьöд кысъясысь вурöм буркаяс. Мöд стен пöлöн нюжöдöм став пöлкаяс тырöмаöсь чашкаясöн, сэнi жö мича паньяс да дзирдалысь-югъялысь мукöд пöлöс кöрта-кöлуй. Орчча вежöсысь восьса öдзöсöд öвтö сола чери дукöн, ныртö гильöдö». Та дырйи ачыс купеч «корысь моз пасьтасьöма», лавкаöдыс ветлöдлö эжöдтöм лёкиник важ маличаöн, кутшöмкö ветьöкöн чышкалö росолöсь кияссö. Дзик лöсявтöмöсь öта-мöдыслы Терешкинлöн олан керка пытшкöсыс да öшинь улыс. «Зеркалöясыс стенсянь пöтöлöкöдзыс. Часiяс вылас пукалöны кöкъяс да горзöны «ку-ку». Стенъяссö шпалеритöма мича цветъяса югыд шпалерöн. Пачьясыс дзирдалöны... видзöдлан да ачыд тыдалан... Джоджъяссö краситöма югъялан краскаöн. Крöвать доръясас вольсалöма неблюй вольяс. Стен пöлöн сулалöны небыд стулъяс, диванъяс. Стенъясын öшалöны гырысь картинаяс...» – висьтасьö Генялы чуймöм Ануш, кодi аддзылöма Кузьмалысь олан жыръяссö. Геняöс дöбельки шензьöдö тайö дивöыс, сы вöсна мый купечлöн öшинь улас дзик мöд серпас: «Двор пасьталаыс туплясисны жугласьöм кöр дадьяс, бöчкаяс». «Озырлуныс нёль амбарö оз тöр, а век оз убöлит шыблавны жугласьöм бöчкаяссö да кöр дадьяссö… Киссьöм дадьяссö ар кежлö бара на дзоньтöдалас»,– гöгöрвоöдö Генялы мамыс. Роман чöж автор некымынысь серпасалö Терешкинлысь чужöм-мыгöрсö да быд пöрйö пасйö сылысь мисьтöмлунсö, неморт ногсö. «Паськыд гöрд тош, кузь ус да син весьтö öшйöм кыз синкымъяс вöснаыс сiйö кажитчис ещö нин скöрöн»,– татшöмöн петкöдчö Макласа олысьяслы лавка кутысь Кузьма.
Гöля олысьяс вылын озыръяслöн ыджыдалöмыс ёна тыдалö оз сöмын бöръяясыслысь лёклунсö да горшлунсö эрдöдöмысь. Авторыс лэптö сёрни сы йылысь, мый уджалысь йöз тшöкыда кутöны асьнысö кывтöм пемöсъяс моз, да та вöсна и кокни кöзяитны на вылын. Сiдз, няр керкаса уджалысьяслы юрас оз волы сувтны паныд удждоннысö быд ногöн чинтöмлы. «Тайö косöдöмъясас рабочöйяс важöн нин велалiсны, да некод гораасö эз и шуась»,– тöдчöдö висьталысь. Йöзыс абу велалöмаöсь дорйыны öта-мöдöс – тайö бура воссьö, кор Беляк Макар мыждö гусясьöмысь мыжтöм нывбабаöс, öтка мамöс. Лоöмторсö тэчöма градация ногöн: быд выль юöр, быд выль серпас да висьталöм ёнмöдöны сыöдз вöвлöмсö. Педöралöн «гусясьöм» йылысь медводз тöдмалам Генясянь. Сiйö котöрöн пырö Невольскийясö да юöртö: «Чурка Дунялöн мамыс, шуöны, Беляк Макарлысь шöвк чышъян да исерга гусялöма. Йöзыс помтöм чукöрмöма. Морöс вылас пöвтор öшöдöмаöсь. Мый сэтчö гижöма, эг вермы лыддьыны. А нуöдысьясыс тшöктöны горзыны: «Ме воровка!». Кытчöкö ва дорö лэччöдiсны». Генялöн висьталöмыс сьöлöм дойдана, нывбабаöс дорйыны ышöдана, а сы бöрын локтысь юкöныс дзикöдз вир пузувтана: «Няйт туй вывтi ... код морт моз шатлалiгтыр восьлалiс косясьлöм, няйтöсь паськöма нывбаба. Дзугсьöм лёзь юрсиыс лэччöма пельпом вылöдз. «Воровка» мышладорын гоз-мöд воськов сайын, киö ньöр босьтöмöн… важнöя восьлалiс Беляк Макар». Кажитчö, мый татшöмторйыд вермö бырöдны падъялöм и полöм, корö уськöдчыны тешитчысьяс вылас. Но йöзыс чöв олöны да, весиг, быттьöкö, öтдортчöны, коньöр нывбабаысь, кöть эськö ас кежысь жалитöны сiйöс да тырвыйö оз эскыны Беляк Макарлы. Авторыс паныд сувтöдö Педöралысь да став мукöдыслысь ортсысö. Педöра – косясьлöм, няйтöсь паськöма, лёзь юрсиа, йöжгыльтчöма ньöрйöн кучкалöмысь. Беляк Макар, мöдарö, праздничнöй пинжака, гöрд сатин дöрöма, восьлалö важнöя. Сылы отсасьысь Симонлöн «юр чут йылö öшйöдыштöма югыд кöзыра лöз картуз, пинжак морöссö паськöдöма, вомас тшынасьö кыз чигарка…». На бöрвылын восьлалысь йöз тшöтш мича паськöмаöсь. «Дзик крестнöй ход кодь»,– кывкöрталö висьталысь да тайöн нöшта на ёсьмöдö Педöралысь öткалунсö, йöзлысь шогмытöм чöвлунсö.
Но вына йöзыс роман геройяс пöвстын эмöсь жö. Ануш сувтö паныд бать-мамыслы, пышйö гортсьыс, мед не петны озыр, но мустöм верöс сайö. Позьö шуны, мый том ныв медводдзаысь Маклаын торкис озыр мортлысь кöсйöмъяс. Веськыдтöмлунлы паныд сувтö Вася Манзадей: эскöдны власьтъясöс, мый сiйö абу морт виысь, оз куж, а ыж моз кывзысьны ловтöм законысь оз жö кöсйы. Васялы, кыдзи и Анушлы, ыджыд отсöг сетöны политссыльнöйяс, но та дырйи колö гöгöрвоны авторлысь юрнуöдан мöвпсö: Невольский да сылöн ёртъясыс вермисны отсавны сöмын налы, кодi ачыс вöлi дась жö сулавны ас вöснаыс. Ануш да Вася и асьныс абу коньöръяс. Буретш татшöм том йöзыс отсасьöны налы, кодi сулалö власьтлы паныд. Романлöн бöръя юкöнъясын лыддьысьысь аддзö кык другöс, Васяöс да Геняöс, сöвет власьт вужйöдысьяс пöвстысь, мый ясыда восьтö став гижöдыслысь могсö – петкöдлыны, кодъяс лоöны важ олöм ёрысьясöн да выль олöм тшупысьясöн.
«Изьва гызьö» да «Му вежöм» романъясын ыджыд пай босьтöны Гражданскöй война серпасъяс. Война кадлысь образсö джудждöдöм могысь гижысь бöрйöма зэв мöрччана висьталанног. Лоöмторъясыс абу колян кадынöсь, найö воссьöны-мунöны лыддьысьысь син водзын öнi, быттьö сцена вылын. Чижовкаын, волостнöй управаын, керкаясын, ывлаын – быдлаын йöзöс нöйтöм, дойдалöм, вир кисьтöм. Ставсö серпасалöма зэв натуралистичнöя, збыль олöмсьыс мисьтöмторсö да весьöпöртанасö дзебтöг. Гижысьыс веськыда йитö «Му вежöм» романлысь нимсö Библиялöн бöръя юкöнкöд, кöнi висьтавсьö Югыдлöн пом йылысь. Война кадыс кажитчö Макласа войтырлы му выв олöмлöн бöръя лунъясöн, му вежöмöн. Дерт жö, авторыс зiльöма петкöдлыны аскиа лун вöсна тышлысь коланлунсö, сöвет власьт дорйысьяслысь героизмсö. Но талунъя лыддьысьысьлы мыччысьö ыджыдджыктор. Кутшöм кокниа бырöдöны öта-мöднысö паныд сулалысьяс, кутшöма вöйтчöмаöсь геройясыс морта-мортлысь олöм мырддян уджас! Сiдзкö, весиг бурджык, югыдджык олöм вöсна тышлöн чужöмбаныс мисьтöм, скöр.
Яков Митрофанович Рочев колис литература историяö ыджыд гижöд – эпическöй трилогия – лöсьöдысьöн. Гижысьлöн да геройясыслöн видзöдласъясыс öнiя лыддьысьысьлы вермасны мыйöнкö и не лöсявны, öд талун эм ыджыдджык позянлун мöд ногöн донъявны важ кадсö, Гражданскöй войнадырся вöвлöмторъяссö. Та вылö видзöдтöг, гижöдыс кольö историческöйöн. Сiйö восьтö сöвет кадö олысь мортлысь позициясö, кодöс тшöтш колö пыдди пуктыны и миян лунъясö.

_______________
1 Танi да водзö текстысь юкöнъяс вайöдöма татшöм издание серти: Рочев Я.М. Кык друг: Роман. – Сыктывкар: Коми книжнöй издательство. – 1983.
direct kamagra uk cheap cialis uk